Tuesday, January 4, 2011

მეორედ მოსვლა ***პაატა ნაცვლიშვილი***

დიდი, ცისფერი თევზი აწყდება აკვარიუმის დაორთქლილ კედლებს,
ის ცდილობს, მაგრამ თავის დაღწევას ამ კედლებიდან ვერასდროს შეძლებს.

ნიშაში ჰკიდია ღვთისმშობლის ხატი და ჩვილი ქრისტე მარიამს ეკვრის,
მან ჯერ არ იცის, თუკი ამქვეყნად სადმე არსებობს გვირგვინი ეკლის!

ან თუ საერთოდ არსებობს რამე, დედის სითბოს და ალერსის გარდა,
ან თუ ოდესმე მოუწევს მისვლა სიკვდილ-სიცოცხლის გარდუვალ ზღვართან,

ბევრი უნდა ქმნას, ვითარცა ღმერთმა და უფრო მეტი ვითარცა კაცმა,
მაგრამ არაფერს აპატიებენ__ ქრისტეს დასჯიან, მას ელის ჯვარცმა.

რაც წინასწარვე განსაზღვრულია, იმას ვერ შეცვლის ვერც ის და ვერც სხვა;
და მაცხოვარი აუქციონზე გაიყიდება 30 ვერცხლად!

საიდუმლოა სერობა ესე, მოციქულები გვერდიგვერდ სხედან,
იესო უკვე ზეცად მაღლდება და ძვლივს მიათრევს საკუთარ ცხედარს

და დასხდებიან ოთხთავის წერად იოან, მარკოზ, მათე და ლუკა:
ის არ მომკვდარა, მხოლოდ წავიდა და დაბრუნდება ოდესმე უკან!

აკვარიუმის კედელებს აწყდება თევზი დიდი და ციფერი ერთობ,
ნუ დაბრუნდები, ნუ დაბრუნდები, ნუ დაბრუნდები მიწაზე ღმერთო!

ნუ დაბრუნდები, ნუ დაბრუნდები, რადგან შეხვედრა იქნება მკაცრი,
თუ მაინც შენსას აღარ დაიცდი დაბრუნდი როგორც უბრალო კაცი!!!


1 comment:

  1. პაატანაცვლიშვილის სხვა ლექსები სად მოვნახოო?

    ReplyDelete