ზეცა აფიშაა **ლევან ქერდიყოშვილი**

ზეცა აფიშაა (უნდა ჩამოვხიო)

და ზედ აწერია ყველა მოქმედება,

ღმერთი – რეჟისორი – მიმზერს სამოთხიდან,

ეშმა – სუფლიორი – (დიდი მოყბედეა)

რასაც მიკარნახებს ყალბი პათეტიკით,

მასას (მაყურებელს) სულში ვუტრიალებ;

რაც მაქვს ფასეული ვფანტავ აქეთ–იქით,

რჩება სიყალბე და მხოლოდ ფუტლიარი

შიგთავსის გარეშე და სულ სხვა პიესის,

სულ სხვა რეჟისორის, სხვა თამაშს ვთამაშობ

ვატყობ და მღრღნის რაღაც, რომ ვერსად ვთქვი ესეც

და ვხვდები, მართალი არა ვარ ამაში.

ახლა კი ნიღბების ჩამოხსნის ჯერია,

კმარა რაც სიყალბე გულში ჩავიხვიე,

ფეხებზე მკიდია თუ რამე წერია,

ზეცა აფიშაა – უნდა ჩამოვხიო!

04.02.2012.

ბობნევი. ღამე.