თითქოს არასოდეს არ ვყოფილვართ.. **ნინი ელიაშვილი**

თითქოს არასოდეს მიცხოვრია,

ისე შემაშინა ლაბირინთმა..

სხვისით დაწყებული ისტორია

ბოლოს სიმარტოვემ გამირითმა..

ფიქრი ფიქრს რომ საღად შევაჯახეთ,

მერე ლამის ფრთები გამომესხა..

ალბათ მისწრებაა ჯოჯოხეთი,

ჩემთვის გამოგონილ სამოთხესთან..

ღმერთმაც არ იცის და მე რა გითხრა,

რად მაქვს სუნთქვა ყელში ამოსული??

მზეში ამოსვრილი მწერალი ხარ,

მე კი მელექსე ვარ მარტოსული..

თითქოს შენც არასდროს არ ყოფილხარ..

მაინც უსასრულოდ მტკივა ნიჭი..

ნიჭი, რომლის ხელშიც ნაყოფი ხარ..

მაგრამ რა უნიჭოდ მოაბიჯე

ჩემთან და უნიჭო ერთგულებით

უკვე დავემსგავსეთ ყველა მოკვდავს..

ქვეყნად სხვას არავის ვეგულებით,

ჩვენ ხომ ერთმანეთი ციდან მოგვყვა..

თითქოს არასოდეს მიცხოვრია..

თითქოს შენც არასდროს არ ყოფილხარ..

ისევ მეორდება ისტორია..

ისევ აკრძალული ნაყოფი ხარ...